Am 3. Wochenende im Oktober feier ma in Tröpolach zu Ehren des Heiligen Georg Kirchtog. Und so wors a heuer wiede soweit für 529. Tröpolacher Kirchtog! Ongfongen hot da Kirchtog für die Zechmasta und Sträußlbinderinnen beim Bindn der Sträußlan für die Burschenschoft, Musiker und Ehregäst. Die Dirndlan hobm sich natürlich ums laibliche Wohl der Zechmasta gekümmert... ...und am Ende sein doch anige Bliamlan gebundn worn.

>>> zu den Bildern vom Sträußlbinden <<<

 

Kirchtsomstog, 14 Uhr, der erste Böller ertönt - damit hot unsa 1. Schussmasta Martin Filippitsch den Kirchtog eingleitet... ...und des wor natürlich für olle Tröpolacher des Zeichn, dass da Kirchtog ongfongen hot und viele sein a glei zum Kirchtogsfeuer kumen. Wie ongekündigt hots donn a Gulasch gebm und hot vermutlich a guat gschmeckt und den an oda ondan a guat geton Am Obmd wor donn schon a lustige Kirchtogsstimmung zu verspührn... ...weil nit nur Tröpolacher sondan auch a poor Unterkärtner für musikalische Stimmung gsorgt hobm. Am Ende is donn a schiana Kirchtsomstog a zur Neige gongen oba do hob ma jo noch anige Tog vor uns ghob

>>> zu den Bildern vom Kirchtsamstag <<<

 

Am Suntig in da Friah is donn die Burschenschoft mit da Trochtenkapelle Wulfenia zur Kirchn marschiert, wo donn die Heilige Messe stottgfundn hot. A poor Manda worn zwor noch miad vom Vortog... ...oba bei so an schian Wetta is noch da Kirchn beim Burschenstan am Kirchplotz a fest musiziert und gsungen worn. Im Onschluss is donn da gonze Trupp weita zu den Gosthäusern marschiert... ...wo den Wirtsleutn a Glasl Wein ongeboten wordn is und wieda des ane oder ondere Stückl gsungen worn is. Am Nochmittog noch da Segensondocht is es donn Richtung Festgelände gongen... ...wo die Zechmasta mit ihren Sträußlbinderinnen den Kirchtog mit an Tanzl eröffnet hobm. Am Nochmittog sowie am Obmd hot uns die "Du & i Partyband" unterholtn... ...und die Tonzfläche wor stets guat besuacht. Mit muats ana Gaude hot sich donn da Kirchtsuntig a wieda dem Ende zuageneigt.

>>> zu den Bildern vom Kirchtsonntag <<<

 

Am Kirchtmontig in da Friah wor donn des Burschenamt in da Pfarrkirche Tröpolach an der Tagesordnung... und danoch hassts donn "bitte lächeln", denn wia's holt so is noch Tradition, werd den Zuhörern a guats Schnapsl ongeboten... ...während die Burschen und MusikerInnen des alte Liedgut zu ihrem Bestn gebm. Auch den verstorbenen und gefallenen Zechburschen werd am Montig bei ana Kronzniederlegung am Kriegerdenkmol gedenkt. Des Musikstück "Ich hatte einen Kameraden" sowie des Gesongsliadl "Bei Grodeck" is immer wieda a ergreifendes Erlebnis am Tröpolacher Kirchtog! Noch an kurzn Weitermarsch sei ma donn im Gosthof Filippitsch eingekehrt, wo's donn a guate Kirchtogssuppm für die Dirndlan und Burschen gebm hot Nochmittog is es donn mit Traktor und Ziachwagile in 2 Gruppen zum traditionellen Obsuachn gongen. Die Musiker hobm natürlich an Tusch gspielt, während die Zechmasta die Leut des Hauses aufn Kirchtog einglodn hobm! Auf olle Fälle hot des Obsuachn mit unsara Traktor-Alternative a muats an Spaß gmocht Am Obmd donn wor donn auch unser Bürgermeister Siegi Ronacher mit da Tröpolacher Geimeinderätin Vroni Kilzer (nicht am Bild) zu Besuach. Auch unser Stodtrot DI Leopold Astner wor selbstverständlich als Tröpolacher jeder Zeit dabei! Auf da Tonzfläche hot man oft schon kaum noch an Plotz gfundn... ...den am Kirchtmontig hobm uns "Die Osttiroler Bergvagabunden" unterholtn, de a ausgelossene Stimmung unter die Leit gebrocht hobm Oba selbst anige Burschn hobm donn a noch Zeit gfundn, ihre Kindheit wieda a bisl auflebm zu lossn und mit an Traktor zu spieln Leider geht a da Kirchtmontig amol zu Ende oba für olle wors a lustiga Tog!

>>> zu den Bildern vom Kirchtmontag <<<

 

Da Kirchtdienstig hot donn mitn Sockhupfn ongfongen und do hob ma glei amol unsare Dirndlan dawischt, de noch an "kloren Bergwossa" brav um die Wett ghupft sein und wir Burschen aufpassn hobm miasn, dass se uns wohl nit obhaun A die Kinda hobm donn a Gaude beim Sockhupfn ghob, weil se a gwusst hobm, dass es bestimmt wieda a Tofl Schokolade gibt Beim Hefnschlogn danoch hots wohl anige sehr unverhofft dawischt... ...und anigen is es a gonz haß wordn, nit nur weil se so oft den Hefn nit getroffn hobm Des Zomsitzn am Kirchtogsfeuer is natürlich immer wos schens... ...vorollem wenn ma waß, dass da Mitterberger Sepp mit seiner johrelongen Erfohrung wieda a feine Frigga kocht. Die Frigga hot am Ende donn wohl ollen Gschmeckt und wor a supa Ausklong zum Tröpolacher Kirchtog 2014!

>>> zu den Bildern vom Kirchtdienstag <<<

 

Und so so is am Ende des Kirchtogs für den Burschenschoft Tröpolach a Bedürfnis ollen Besucherinnen und Besuchern a herzliches "Vergelt's Gott" auszusprechn. In diesem Sinne freun wir uns schon wieda auf den Tröpolacher Kirchtog 2015, der hoffentlich genau so schian und lustig werd wiea heuer!!!