Kirchtog - ans der schenstn Feste für die Tröpolacher Ortsbevölkerung - und am 3. Wochenende im Oktober wors hetz wieda soweit - zu Ehren des Hl. Georg, da Schutzpatron unserer Kirche, hot heuer a klana Jubiläums-Kirchtog stottgfundn, denn da Tröpolacher Kirchtog hot sich heuer zum 530. Mol wiederholt. Grund gnuag für viele Leit wieda ins Dorf zum Schaugn und des zu feiern. Pünktlich um 14 Uhr am Somstog is des Kirchtogsfeuer entzündet und da Kirchtog eingschossn wordn! Für des Feiale brauchts natürlich aniges an Holz wos die Leit da Burschenschoft gspendet hobm. Nochanond seind die Schüss von da Kanon durchs Dorf ghollt... ...und für die Leit wors klor: da Kirchtog is do! Ob zum Feuer! A bisl zomstian, a Schnapsl zwischendurch, Kirchtog is, wos soll do noch fehln? Long hot man nit wortn miasn, bis a Haufn Leit beinondn wordn und den Kirchtog begriaßt hobm! Als klane Stärkung in Forma von ana Gulaschsuppm hots heia a wieda gebm! Da aktuelle und da olte Zechmasta hobm sich`s a nit nehmen lossn, a Runde mitn Schnops zum Geahn Weils doch recht frisch wor, hot man a immer die Wärme vom Feia gsuacht ... und hoffentlich a gfundn Selbstverständlich sein donn a schon die ersten Liadlan am Kirchtog erklungen bevor sich donn jeder (fost) ham ausschlofn gongen is!

››› Bilder Kirchtsamstag ‹‹‹

 

Fesch gsacklt, frisch und munta ... die meisten holt... ...is es donn in Begleitung von unsra Trochtnkapelln Wulfenia Richtung Kirchn zum Gottesdienst gongen. Noch da Mess hot sich donn olls wieda umman Burschnstan vasommelt... ...und die TKW hot anige Liadlan gspielt und zom mit den Burschn a anige Liadlan gsungen. Viele Leit hobm den schönen Klängen glauscht... ...während die Zechmasta mit ihren hübschen Sträußlbinderinnen Wein ongebotn hobm. Mittlerweile gibts jo wieda anige Trochtnfrauen in Tröpolach, de zum Kirchtog des schiane Gwandl a wieda ausgepockt hobm. Und anigen Burschen reicht onscheinend 1 Dirndl nit zzzz.... Donn is es oba a schon wieda weitergongen... ...denn die Gosthäuser dürfn jo a nit fehln am Suntig... ...wo donn die Wirtsleit wieda mit roate Mascherln begriaßt wordn sein! Nit nur fesche Diandlan sigt man am Kirchtog rundumadum... ...a die Musik konn sich auf Nochwuchs, neue Musiker und vielfältigere Musiker freun. A beim Durnthola is donn des ane oder ondre Stückl gspielt und gsungen wordn. Noch da Segsnondocht am Nochmittog hot sich donn olls wieda beim Burschenstan vasommlt... ...und die Kehle mit dem an oda ondren Schlückerl Wein befeuchtet wordn Danoch wor donn a wieda Obmarsch zur neu gestolteten Ortseinfohrt mit ana Wulfenia, wo donn da Gratzer Peter a klane Onsproche gholtn hot und ollen Beteiligten und Unterstützern recht herzlich gedonkt hot! Onschließend is es donn im Marsch zum Festgelände des Kirchtogs gongen... ...wo donn die Zechmasta mit ihren Sträußlbinderinnen den Kirchtog mit an (flotten) Tanzl eröffnet hobm Danoch hobm donn mit den Gailliern, Klaus & Band sowie TroMonika glei 3 Musikgruppen (darunter 2 örtlich Onsässige) für Unterholtung gsorgt. A Gaude wor ollen Besuchern onzusegn,... ...da Zechmasta hot auch a poor Themen beredet... ...und a die Musik hot senan Spaß mit de Burschn und Diandlan ghobt

››› Bilder Kirchtsonntag ‹‹‹

 

Schian hot da Montig nit ongfongen... ...oba des hot da guatn Laune kan Obbruch geton Nochn Burschenomt hobm sich donn olle am Kirchplotz zomgstellt und die Musik hot zuerst amol mit musikalischen Klängen für freudige Stimmung gsorgt. Traditionell bieten die Zechmasta am Montig jo Schnops on, wos oba nit jedn schmeckt Selbstverständlich werdn a olte Liadlan von de Manda und Burschen zum Besten gebm! Still hobm sich donn olle zum Kriegerdenkmol begebm, wo den gefollenen und verstorbenen Zechburschen gedocht werd. Des Grodeck-Liadl is für viele ana der schensten Momente am Kirchtog und treibt so monchen a Träne in die Augn! Noch dem Gedenken is des donn zum Filippitsch gongen... ...wo die Burschen und Diandlan sich mit ana Kirchtogssuppm gstärkt hobm. Denn am Nochmittog wor des Obsuachn am Programm. Wieda in 2 Gruppen is jedes Haus in Tröpolach und Schlanitzen besuacht wordn und dabei die Bewohner aufn Kirchtog glodn wordn. Is schon lustig wenn die Gruppnan donn oft amol irgendwon zomkumen und bei an flottn Polka auch a Tanzl gwagt werd Sichtlich müde sein die Burschen donn am Obmd beim Winkla von de Bergvagabunden obgholt... ...und gemeinsom ins Festzelt begleitet wordn! Die Osttiroler Bergvagabunden hobm donn für beste Stimmung gsorgt... ...und die Tonzfläche wor die meiste Zeit guat besetzt. Mehr oda weniger longe Toge sein hinter an glegn oba onzumerken wor`s nit a jedn - a Gaude wor und gfeiert is bis in da Fruah worn.

››› Bilder Kirchtmontag ‹‹‹

 

Am Dienstog wor donn wieda für die Kinda a Spaß, denn es wor Sockhupfn ongsogt! Fest sein se um die Wett ghupft und nit nur unsre Diandlan von da Burschenschoft hobm sich gegn`s Hupfn gsträubt Nochn Sockhupfn sein die Säck ausakumen und auf amol worn olle Manda und Burschen stets auf da Hut ... oft amol vergebens So schnell hot man gor nit schaun kennen und schon is ma uman Pumpazona gedraht wordn... ...und hot da blind da Ziehhatza über Stock und Stan folgn miasn! Oft amol hots wohl a Weil gebraucht bis da Hefn hin wor und da "erlösende" Schuss ertönt is! Später sein donn olle noch beim Feuer zomgruckt... ...und hobm sich schon sehr auf a guat Frigga vom Sepp und`n Christian alias Lama gfreit! Und so hot man holt den Kirchtog noch bei an schian Feiale ausklingen lossn.

››› Bilder Kirchtdienstag ‹‹‹

 

Tjo, oba jeda Kirchtog neigt sich amol dem Ende zua und wos bleibt ondres zum Sogn, a schiana Kirchtog liegt hinta uns, die Blattlan folln vom Bam, da Herbst hot Einzug gholtn und a wenn anige froh sein, dass da Kirchtog hetz vorbei is, so freit man sich a schon wieda aufn nächstn Kirchtog!

Und bis durthin: passt`s auf enk auf